Ívar Valgarðsson (f. 1954) er listamaður sem hefur áhuga á eðli hlutanna. Hann notar ofur kunnuglegan og algengan efnivið til að búa til innsetningar sem fjalla á ljóðrænan hátt um hvernig skynjun skapar heiminn. Ívar hefur skapað nýtt verk fyrir sýninguna, Úthaf, innsetningu sem tekur heilt sýningarrými og samanstendur af 179 ljósmyndum og málverki. Úthaf fjallar um mikilfengleika hafsins sem umlykur Reykjanesbæ og einstaklingseðli upplifunar. Auk nýja verksins eru einnig verk sem spanna listamannsferil Ívars. Hér er því fágætt tækifæri til að kynna sér skarpskyggni listamannsins og trúfestu við ákveðna aðferðarfræði um árabil. Tími er ávallt til staðar í verkum hans. Sköpunarferlið endurspeglast oft í tímalegri upplifun áhorfenda. Þessi upplifun á tíma er mögulega mesti grundvallarþáttur náttúrunnar – og fyrir Ívari er náttúran forsenda alls.

Ívar Valgarðsson sótti nám í Myndlistar- og handíðaskóla Íslands frá 1971. Þar kynntist hann hugarheimi Harðar Ágústssonar (1922-2005), sem var þá skólastjóri, og myndhöggvarans og kennarans Jóns Gunnars Árnasonar (1931-1989). Þetta var gjöfult tímabil í íslenskri myndlist og tók Ívar snemma á ferlinum þátt í sýningum SÚM hópsins. Hreyfingin hafði ekki yfirlistan stíl en kynnti snemma til sögunnar hugmyndir og aðferðir sem tengjast nýdadaisma, flúxus og annarskonar framúrstefnu.

Síðar, þegar hann var við nám í Hollandi dýpkaði þessi tenging við konseptlistina. Á því tímabili voru tengslin innan listanna í gagngerri endurskoðun. Ívar hafði áhuga á breytingum á fræðilegum áherslum sem fluttust frá abstrakt expressjónisma yfir í hugtakahyggju og minimalisma. Áköf efniskennd og yfirgengilegir tilburðir abstrakt expressjónismans tóku að víkja fyrir vélvæddum ferlum og textalýsingum. Á vissan hátt hafa verk Ívars verið rannsókn á þversögninni hvernig málverkið og konseptlistin geta verið til samtímis. Verk hans búa yfir efniskennd og oft á tíðum málverkalegri nærveru og má líta á þau sem framverði í ríkulegri hefð íslenskrar myndlistar sem eiga sér rætur í málverkinu en rýna í efnisþætti þess og sýningarsamhengið.

 

Sýningarstjóri Úthafs er Gavin Morrison.

Gavin Morrison er skoskur rithöfundur og sýningarstjóri sem býr í Bandaríkjunum. Hann er að skrifa bók um samband Donald Judd við Ísland fyrir Lars Müller Publishers í Zürich, sem verður gefin út árið 2026. Gavin er einnig að þróa sýningu með Listasafni Geogria í Tbilisi, um arkitektinn Berthold Lubetkin og rithöfundinn og hönnuðinn Ilia Zdanevich.
Gavin hefur gegnt ýmsum stöðum sem sýningarstjóri og forstöðumaður. Hann var forstöðumaður Skaftfells, miðstöð myndlistar á Austurlandi, frá 2018-2020 og einnig var hann fyrsti sýningarstjóri Fort Worth Contemporary Arts. Árið 2017 hlaut Gavin rannsóknarstyrk Lewis Walpole Library, Yale háskóla í Bandaríkjunum og árið 2015 var hann í vinnustofudvöl Brown Foundation Fellows í Maison Dora Maar, Ménerbes, Frakklandi.

 

Listasafn Reykjanesbæjar mun gefa út bók sem tekur til alls myndlistaferils Ívars Valgarðssonar.
Útgáfan er unnin í samstarfi við Hörð Lárusson, einn af eigendum Kolofon hönnunarstofu, textar eru eftir Gavin Morrison, þýðing Helga Soffía Einarsdóttir og myndvinnsla Vigfús Birgisson.
Bókin kemur út á sýningartímanum.

 

Úthaf er styrkt af Safnasjóði og listamaðurinn er styrktur af Myndlistarsjóði.

 

Sýningin stendur yfir til 19. Apríl 2025.